செட்டிலாகியாச்சு அப்புறம் என்ன?

“அப்பாடா ! படிப்ப முடிச்சிட்டு, ஒரு வழியா நல்ல வேலையில செட்டில் ஆகியாச்சு.”

“இனிமே என்ன?…. கல்யாணம் குழந்தைதான்.”
“ம்ம்ம்… என்ன குழந்தை முதல்ல பெத்துக்கலாம் … ஆணா பெண்ணா !?!”
“அட! அந்த கம்பெனியில அதிக சம்பளம் கொடுக்குறானா ..! அப்போ இந்த கம்பெனியில பேப்பர் போட்டுற வேண்டியது தான் ;-)”
“பேஸ்புக்க ஹோம் பேஜா வைக்கலாமா … இல்ல கூகில் பிளஸ்ஸ வைக்கலாமா?!…”
“இப்டி யோசிக்கறது ஒரு தப்பா ?”
“தப்பில்லைதானே நான் தான் படிச்சு மேல வந்துட்டேனே, இப்டி எல்லாரும் வந்துட்டா இந்தியா வல்லரசு ஆகிடும் தானே!”
“இந்தியாதான் வேகமா முன்னேறிகிட்டு இருக்கே, அதுவும் தமிழ்நாடு கல்வியில ‘கட கட’ன்னுள்ள முன்னேறிகிட்டு இருக்கு, அப்புறம் எதைப் பற்றி நான் கவலைப்படனும்?”
இப்டில்லாம் என்னை மாதிரியே கேள்வி கேக்குறவங்களுக்கு நான் பார்த்த ஒரு சம்பவத்த சொல்லலாம்னு நினைக்கறேன்.
சமீபத்துல, காளிங்காவரம்ன்னு ஒரு கேள்விப்படாத கிராமத்துக்கு “வழிகாட்டுதல்” [Career Guidance] நிகழ்ச்சிக்கு “நல்வழிகாட்டி” அமைப்பின் மூலமா போயிருந்தேன்.
சரி வழிகாட்டுதல் தானே, போயி நாலு நல்ல காலேஜையும், அதுக்கு எப்படி விண்ணப்பிக்கறது-ன்னும் சொல்லிட்டு வரலாம்ன்னு போனா …
அங்க,

“நீயெல்லாம் படிச்சு என்ன பண்ண போறே! மொதல்ல வீட்டு வேலைய செய், கூடிய சீக்கிரம் உனக்கு கல்யாணம் பண்ணி வைக்கணும்-ன்னு அம்மா சொல்றாங்க. ஆனா எனக்கு படிக்க ஆசை “-ன்னு சொல்லி ஒரு பன்னிரெண்டாம் வகுப்பு படிக்கும் ஒரு கிராமத்து பொண்ணு அழுகுது.
“படிக்காமலே பெரிய ஆள் ஆனவங்க பலர் இருக்காங்களே”ன்னு, இன்னொரு பையன் சொல்றான்.

இதையெல்லாம் பாக்குறப்போ, நான் முன்னாடி சொன்னது சரியில்லையோன்னு தோனுது. இந்த நாட்டோட கடைசி மனிதன் வரை சிறந்த கல்வி சென்றடைய வேண்டியதன் அவசியமும் புரிஞ்சுது.
உங்களுக்கும் அப்படி தோன்றினால், எங்களுடன் கைகோருங்கள் [http://www.nalvazhikatti.org/joinus.htm]
இதைப் பற்றி ஏதாவது பேசணும்னு ஆசைப் படுகிறீர்களா? வாருங்கள் இங்கே [http://discuss.nalvazhikatti.org/index.php]
நல்வழிகாட்டி பற்றி:

கிராமப்புற ஏழை எளிய மக்களுக்கும், மலைவாழ் மக்களுக்கும் கல்வியின் முக்கியத்துவத்தை உணர்த்தவும், கல்வி மற்றும் வாழ்வியல் சம்பந்தப்பட்ட விசயங்களை கற்பிக்கவும் ஆரம்பிக்கப்பட்டது தான் நல்வழிகாட்டி.
இந்த நாட்டின் கடைசி மனிதன் வரை, சிறந்த கல்வி சென்று சேர வேண்டுமென்று பாடுபடும் ஒரு அமைப்பு..

கொசுறு செய்தி :
கொடை வள்ளல் “கர்ணன்” [அதாங்க மகாபாரதத்துல வருவாரே], அவர் போரில் இறந்து சுவர்க்கம் செல்லும் வழியில் தொடர்ந்து போகமுடியாமல் பசியால் துடித்தாராம் [செத்த பிறகு எப்டி பசிக்கும்-ன்னு கேக்க கூடாது 😉 ]. ஏன் இப்டி நடக்குதுன்னு நாரதர்ட்ட கேட்டா… “நீ அன்ன தானம் பண்ணல அதான் இப்டி”-ன்னு சொன்னாராம் அவர். சரி இப்போ என்ன பண்றதுன்னு கேட்க, நாரதர் சொன்னாராம் “ஒருவன் உன்னிடம் பசி என்று வந்த போது, உன் ஆட்காட்டி விரலை நீட்டி அன்னச்சத்திரத்தை காட்டினாய், அந்த விரலை உன் வாயில் வை கொடுரப் பசி நீங்கும்”ன்னு.
ஒருவனுக்கு அன்னச்சத்திரம் காட்டிய அந்த விரலுக்கே அவ்வளவு சிறப்புன்னா…. ஒருவரோட வாழ்க்கைக்கே வழிகாட்டப் போற உங்க கை எவ்வளவு சிறந்ததாய் இருக்கும்…. எண்ணிப் பாருங்கள்.

 

Tagged with: , , , , , , , , , , , , , , , , , , , , , ,
இன்னொரு நான்! இல் பதிவிடப்பட்டது

கடுகு திரைப்படம்

படம் பாத்து நாளாயிடுச்சேன்னு பாத்த படம் – கடுகு. ஆஹா ஓஹோ ரகம் இல்லை. ஆனாலும் என்னை பாதித்து, இரவு 2 மணிக்கு இந்த பதிவு எழுதத் தூண்டியது.

படம் சொல்ல வர்ர கருத்து இதான் – 

0. தப்பு செய்ரவன கண்டுக்காம போர நல்லவங்களும் கெட்டவங்கதான். இதுமாதிரியான (நல்ல)கெட்டவங்கள, தட்டி கேக்ர (நல்ல)நல்லவங்களா மாத்தனும்.

1. பேண்ட் அழுக்கா இருந்தாலும் பரவால்ல ஆனா ஜட்டி சுத்தமா இருக்கனும்னு நினைப்போம். உள்ள உள்ளது (மனசு) ரொம்ப முக்கியம்.

2. பிட்டு படம் நடிச்சி இப்போ பாலிவுட்ல இருக்குர சன்னிய மக்கள் ஏத்துக்கிறாங்க. ஆனா, வேற வழியில்லாம ‘தொழில்ல’ எரங்குன பொண்ணு , மாறி மரியாதையா வாழனும்னா , விடமாட்டாங்க.

3. ஹீரோவா யாரும் பொறக்கரது இல்ல. தப்ப தைரியமா தட்டி கேட்கும் போதுதான் தெரியும், ஒருத்தன் ஹீரோவா இல்ல பொட்டையான்னு.

படம் நகர்ர பாணியே வித்யாசமா இருந்துச்சு. அப்பாவி நல்லவனா வர்ர இராஜகுமாரன் சூப்பர்! பரத்துக்கு நல்ல-கெட்டவன் பாத்திரம். 

1. எளியவன் தப்பு பண்ணா பொங்கி வர்ர அறச்சீற்றம், வலியவன் தப்பு பண்ணா பதுங்கிக்கிறது.

2. தொலைந்த பொக்கிஷம் திரும்ப கிடைக்கும்போது, அதை அந்தஸ்து உள்ள அழகான பையன்தான் கொடுத்திருக்கனும்ன்னு எதிர்பார்கிற பெண்.

3. காதலோட இன்னொருத்தன் ரூட் போட்டிருந்தாலும், அதை மறைச்சி (தானா வந்த) அந்த பொண்ண விட்டுக்கொடுக்காத சுயநலம்.

4. தனிப்பட்ட அதிகாரி நல்லவனா இருக்க நினைச்சாலும், சிஸ்டம் அவன விடரது இல்ல.

5. ஊர்ல நாலுபேரு மரியாதை குடுக்க ஆரம்பிச்ச உடனே (தன்னை சட்டத்துக்கு அப்பார்ப்பட்டவன்னு நினைச்சு) வர்ர ஈகோ.

இதுமாதிரி, நம்ம தினசரி வாழ்கையில நடக்கிற பல விடயங்கள் படத்துல வருது.

பல காட்சிகள முன்னரே யூகிக்க முடிந்தது. கடைசிவர கமர்சியல் சாயம் இல்லாமலே கொண்டு போயிருக்கலாம். (அவன விட்ருன்னு ஹீரோயின் சொல்ல, ஓவரா அழாதன்னு பரத் சொல்ல, நான் அவர்(ராசகுமாரன்) கிட்ட பேசரேன்னு ஹீரோயின் சொல்லும் போது – ஏன் இந்த வேண்டாத விஜய் பொழப்புன்னு சொல்லுது மைண்ட் வாய்ஸ்.)
படத்துல பாடல்கள் இல்லைன்னாலும் பிண்ணனி இசை நல்லாயிருந்துச்சு.

பட்டானி தட்டி பொண்ணுங்கள கேலி செய்ரவங்கள உதைக்ரார் பரத். அதுவே , ஒரு அமைச்சர் இன்னொரு சின்ன பொண்ணுகிட்ட தப்பா நடக்கும்போது பொத்துகிட்டு போரார். இது பயத்தினாலா இல்ல பதவி ஆசையிலான்னு அழுத்தமா படம் சொல்லல. 

படத்துல பல சொதப்பல்கள் இருக்கு. ஆனா அதையெல்லாம் தாண்டி, படம் நல்லாயிக்குன்னுதான் சொல்ல தோனுது.

Tagged with: ,
பார்த்தது, பிடித்தது இல் பதிவிடப்பட்டது

புதிய பயணம்

நன்பரின் வெற்றி நோக்கிய முதல் படிக்கட்டு, வெற்றி தேடுவோருக்கு ஒரு நம்பிக்கை லைட்டு!

எறுழ்வலி

 நான் கல்லூரி படிப்பு முடித்து ஓர் ஆண்டு வேலை முடிக்கும் வரை நான் குறும்படம் எடுப்பேன் என்றோ, ஒரு நிறுவனம் தொடங்குவேன் என்றோ நினைத்ததேயில்லை. நானும் வழக்கம் போல பொறியியல் படிப்பை முடித்ததும் ஒரு பன்னாட்டு நிறுவனத்தில் பணிபுரிந்து திங்கள்தோறும் ஊதியம் பெற்று களிப்படைந்து கொண்டிருந்தேன். வேலை போக மீதமுள்ள நேரத்தில் பொழுதைப் போக்குவதற்காக மட்டுமே இங்கு பதிவுகள் எழுதிக் கொண்டிருந்தேன். அந்தப் பதிவுகளைப் படிக்கும் மிகச் சிலரில் ஒருவனான என் நண்பன் சரவணராம்குமார் என் கதைகளைக் குறும்படமாக எடுக்க முயற்சி செய்யலாம் என்று ஆலோசனை கூறினான் (அப்போது இணையத்தில் மிகச் சில குறும்படங்களே வெளியாகியிருந்தன!). ஆனால், குறும்படம் எடுப்பதற்கான வழிமுறைகள் எதுவும் எனக்கு தெரியாத கரணியத்தால் வேண்டாமென்று அப்போது விட்டுவிட்டேன்.

 

நிகழ்படத்தொகுப்பை அவனே பார்த்துகொள்வதாகவும், இசைக்கு அவன் நண்பன் உதவுவான் என்றும் மீண்டும் சரவணராம்குமார் கூறினான். என்னுடைய வேலை கதை எழுதுவது மட்டும் தான் என்பது போல் தோன்றியதும், என்னிடமிருந்த ஒரு நிகழ்ப்படக்கருவியைப் பயன்படுத்தி படமெடுத்துவிடலாம் என்று தோன்றியது! நண்பர்களை மட்டுமே வைத்து நகைச்சுவையாக குறும்படம் எடுக்க முயற்சி செய்து பெங்களூர் குறும்படத்தை ஒருவழியாக எடுத்துமுடித்தோம். வெறும் கதை மட்டுமே எழுதப்போவதாக ஆரம்பித்து நிகழ்ப்படத் தொகுப்பு, ஒளிப்பதிவு, ஒலிப்பதிவு, நடிப்பு என்று எல்லாவற்றையுமே ஓரளவு கற்றுவிட்டேன். ஒரு குறும்படத்தை முழுமையாக எடுப்பது கடினமாயிருந்தாலும், ‘பெங்களூர்’ குறும்படம் பெற்ற வெற்றி என்னை மீண்டும் குறும்படம் எடுக்கத் தூண்டியது!

 

அப்படி உருவானது தான் உடன்பிறப்புகளே குறும்படம்…

View original post 237 more words

இன்னொரு நான்! இல் பதிவிடப்பட்டது

தமிழக அரசின் ஐ.ஏ.எஸ் தேர்வு பயிற்சி மையம்

தமிழக அரசின் அகில இந்திய குடிமைப்பணி தேர்வு பயிற்சி மையம். இந்த மையம் சென்னை ராஜா அண்ணாமலைபுரம் கிரீன்வேஸ் சாலையில் உள்ள அண்ணா மேலாண்மை நிலைய வளாகத்தில் இயங்குகிறது. இங்கு ஆண்டுதோறும் ஐ.ஏ.எஸ். முதல்நிலைத் தேர்வுக்கு 200 பேருக்கு முழு நேர பயிற்சியும், 100 பேருக்கு பகுதி நேர பயிற்சியும் அளிக்கப்படுகிறது.

இந்த மையத்தில் சேர என்ன செய்ய வேண்டும்?

உங்கள் மாவட்ட ஆட்சியர் அலுவலகத்திற்குச் (கலெக்டர் அலுவலகம்) செல்லுங்கள். அங்கு வரவேற்பறை (அ) நுழைவாயிலில் ஒரு அறிவிப்புப் பலகை இருக்கும். அப்பலகையில் அறை எண் மற்றும் அலுவலகத்தின் பெயர் கொண்ட பட்டியல் எழுதப்பட்டிருக்கும். எடுத்துக்காட்டாக,

அறை எண்      அலுவலகத்தின் பெயர்

022                         பிற்படுத்தப் பட்டோர் மற்றும் சிறுபான்மையினர் நல அலுவலகம்

நீங்கள் நேராக அந்த அறைக்குச்சென்று, ஒரு மனு எழுதித் தரவேண்டும்.

அனுப்புநர்: உங்கள் பெயர் & முகவரி

பெருநர்:  பிற்படுத்தப் பட்டோர் மற்றும் சிறுபான்மையினர் நல அலுவலகம்

பொருள்: தமிழக அரசின் ஐ.ஏ.எஸ் பயிற்சி மையத்தில் சேர விரும்புகிறேன், அதற்கு விண்ணப்பப் படிவம் கொடுத்துதவ வேண்டி

அய்யா,

நான் தமிழக அரசின் ஐ.ஏ.எஸ் பயிற்சி மையத்தில் சேர விரும்புகிறேன், அதற்கு விண்ணப்பப் படிவம் கொடுத்துதவ வேண்டுகிறேன்.

இங்ஙனம்,

தங்கள் உண்மையுள்ள,

உங்கள் பெயர்.

பிறகு அங்குள்ள அலுவலர் உங்களுக்கு அந்த விண்ணப்பப் படிவத்தினைத் தருவார். அதில் உங்கள் பெயர், முகவரி, புகைப்படம், சாதி, மதம், ஆண்டு வருமானம், கைப்பேசி எண் மற்றும் மின்னஞ்சல் முகவரி போன்ற விவரங்களைப் பூர்த்தி செய்ய வேண்டும். மேலும் உங்கள் பட்டப் படிப்பை முடித்ததற்கான சான்றிதழின் நகலையும், சாதி சான்றின் நகலையும் இனைக்க வேண்டும்.  இந்த விண்ணப்பப் படிவத்துடன் ஒரு கடித உறை இருக்கும், அதில் 10 ரூபாய்க்கு அஞ்சல் தலை ஒட்ட வேண்டும். இவற்றையெல்லாம் முடித்தபின் அந்த அலுவலரிடம் பூர்த்தி செய்யப்பட்ட விண்ணப்பப் படிவம், இனைக்கப் பட்ட நகல்கள் மற்றும் கடித உறையையும் சமர்ப்பிக்க வேண்டும். அவ்வளவே, வீட்டிற்கு வந்து நன்றாக படிக்க ஆரம்பியுங்கள். பயிற்சி மையத்தில் சேருவதற்கான இந்த நுழைவுத்தேர்வுக்கும் கடும் போட்டி இருக்கும்.

அனைத்தும் சிறப்பாக அமைய வாழ்த்துக்கள்!!!

மாவட்ட ஆட்சியர் அலுவலகத்திற்கு செல்லும் முன் எடுத்துச் செல்ல வேண்டியவை,

1. எழுதுகோல்

2. வெள்ளைத் தாள் – மனு எழுத

3. பட்டப் படிப்பை முடித்ததற்கான சானறிதழின் நகல்

4. சாதிச் சான்றிதழின் நகல்

5. குடும்ப அட்டையின் நகல் – நீங்கள் அந்த மாவட்டத்தினை சேர்ந்தவரா என சரிபார்க்க.

6. பாஸ்போர்ட் அளவு புகைப்படம்

7. 10 ரூபாய்க்கு அஞ்சல் தலை

Tagged with: , , , , , , , , , , , , , , , , , , , , , , , ,
இன்னொரு நான்! இல் பதிவிடப்பட்டது
முகம்
கிராமத்தான்

கிராமத்தான்

ஓர் இனிய எளிய இந்தியக் குடிமகன்.

View Full Profile →

கீச்சுலகில்
என் புத்தக அடுக்கில்
தற்போதைய ஆக்கிரமிப்பு

கிராமத்தானின் புதிய தேடல்கள் பற்றி அறிய தங்களுடைய மின்னஞ்சல் முகவரியை பதிக.

Join 1,321 other followers

%d bloggers like this: